S Kastva se j po srede, va šetemane za vreme posnih dan, tri puti na leto šlo na procesije.
Jena je bila procesija na Trsat. Istega dana šla j procesija s Kastva i va augustinski samostan ki se j zval opatija sv. Jakova.
A treća je šla na Brgud ki j bil pod jurisdikcijun Klane. Tu se j delil kruh i vino kako i pul sv. Jakova.

Z crekvi sv. Jeleni va Kastve z jenen kanonikon i dva plovana bil je običaj čuda let da procesija gre na Trsat. Hodočastilo se j kapele Gospe od Loreta aš njin je nekada jušto na ta dan grašica se potukla.

Kad su prišli v Reku, nasprotu su njin prišli dva suca z drugun gospodun i z puno grajani, gradsken župnikon i s križi i crkvenemi banderami. Žbiri, stražari i si va procesije su kantali. Najprej se šlo va gradsku župnu crekvu.
Čin je procesija finila, Kastafci su hodili va rečku gradsku vijećnicu kade su njin gradska gospoda dala mericu (lagvić) vina i sakemu po jedan kruh i salatu. Tu su jili i pili. Puno njih je oblatilo stolnjaki, al trapidi po zideh. Neki su trli ruki blatne od ula i octa od salati va ti trapidi pa je gradsko vijeće otelo da njin se da njiho jilo i pilo na drugen meste, ma oni nisu oteli nego po svoju, po užance.



— Taj je sirovi puk hitro i nerazborito otrčao u vijećnicu i nikako se nije dao odvratiti od svoje stare sloboštine — zapisal je Valvasor. Kad su pojili i popili, sponova su šli va procesiju kantajuć kako i kad su šli nutra. Kad su opeta pred gradon prišli na isto mesto kade su se si skupa našli, Rečani su se vrnjali va grad, a Kastafci su njin za zahvalu dali jaja, ka su dobili od judi ki su živeli va kućah kuda je pasevala procesija z Kastva v Reku.

Po zapise Johanna Weicharda Valvasora 1689. leta

(Iz knjige ŠTORIJE Z KASTAFŠĆINI I OKOLE, Dragica Stanić, Udruga čakavski senjali, Kastav 2020.)